home

 
 

I L     V I C O L O

 
 

 

 Personaggi:

      GIOANNI     falegname

                FRANCISCO    apprendista             

CAROLINA      serva     

             'NDONIO       figlio di Carolina

 

Quadretto di vita paesana con pochi personaggi e molti ricordi.

 

In un vicolo di Buonalbergo, Gioanni e Francisco stanno tagliando con "lo stroncone" (segacchio) un tronco di quercia appoggiato su un cavalletto.          

 

GIOANNI          Francì, 'sso stroncone s'add'ammolà!

FRANCISCO     Oramai imo fatto. E' romasto sulo 'sso ciocchero.

GIOANNI          Ma lo vi' ch'ea chino de nudechi.

FRANCISCO     Non te preoccupà! Acconza 'sse zeppe sott'a 'ssi

                            cavalletti e mittete chiù auto.

GIOANNI          Sarrà megghio si lo spaccamo co lo magghio.

CAROLINA        ( entra tenendo sulla testa un barile ) Ué!

                           Ve serve aiuto?

GIOANNI          Se, se...Aiutece a mantené 'sto ciocchero.

CAROLINA       Pecché, da sulo non se mantene?

FRANCISCO      Se mantene e come. Lasselo j a quisso.

GIOANNI          Carolì, addò vai?

CAROLINA       Addò pozzo j co lo varrilo 'ncapo?

GIOANNI          Viat'a te, ca te vai a defrescà no poco.

CAROLINA        Io stao sempe fresca...tengo la sparra bagnata.

GIOANNI          E tieni puro lo varrilo senza stuppolo.

FRANCISCO     Carolì, si non ce la fai, te veng'aiutà a 'mbonne io.

CAROLINA       Non agghio bisogno d'aiuto. E moviteve a tirà 'ssa

                           sega. Statevi buoni!

FRANCISCO      Tè, Carolì, inghiece 'sto cicino.

CAROLINA       Tanto la jummenta va scarreca...

FRANCISCO     Me, ca pò te damo 'na levena pe te 'mbocà quann'è

                            vierno.

CAROLINA        Agghio proprio bisogno de la levena toia. Fammenne j.

                           (esce)

GIOANNI          E che femmena! E' stata 'na nottata a ammassà; è           

                           portato lo pane a lo furno; pò è ghiuta a torce li           

                           panni de la colata...Non se ferma mai. Benedica!

FRANCISCO      Tene 'na salute de fierro.

'NDONIO          ( entra di corsa ) Iti visto a mamma?

FRANCISCO      Se, se...La portava 'mmocca 'no cano.

GIOANNI          Iusto mò è passata. E' ghiuta a la fontana de lo

                            municipio.

FRANCISCO      Che c'ea dice?

'NDONIO          M'a da dà la chiave de casa, ca tatillo va trovenno

                           lo chiantaturo.

FRANCISCO     Parito non accocchia! Lassa lo chiantaturo a la casa.

GIOANNI          Famme sente. Ma mò èa j fore?

'NDONIO          Sine

GIOANNI          E le ffico ce stanno?

'NDONIO          Hai voglia.

GIOANNI          E portemenne no panaro ca te dao vinti lire.

'NDONIO          Ce lo dico a tatillo...

FRANCISCO     La vì lò a mammeta, mò s'arretira.

CAROLINA       ( entrando, a 'Ndonio ) Uagliò, che fai llò?!

FRANCISCO      Dice ca lo patre s'è scordato lo chiantaturo.

CAROLINA       E quanno mai! Va a zappà senza zappa, a mete senza

                           fauce e senza canniddri, a potà senza l'accetta...

FRANCISCO     Insomma, se scorda sempe lo stromento.

CAROLINA       'Ndoniù, teccote la chiave. Abbiete. Lo chiantaturo

                            sta dint'a la visazza, vicino a la varda

'NDONIO           Mò lo vavo a pigghià subito. (esce di corsa)

GIOANNI           Mè, Carolì, damme 'sso cicino. Famm'appizzicà.

                           M'agghia fa 'na veppeta...( prende il cicino e beve )

FRANCISCO     Non te la fenisce tutta quanta! Quisso è 'nu cicino

                           no 'na otta.

GIOANNI          ( dà il cicino a Francisco e si asciuga le labbra )

                           Ah! Carolì, m'hai addecriato!

CAROLINA       T'addecrii co' poco. Fammenne j a fa a mangià.

GIOANNI          Che fai de buono?

CAROLINA        Tagghiarelle. Tengo già lo taolillo preparato. Quando           

                           meno la laena co lo lainaturo.

FRANCISCO     Quanno se tratta de menà lo lainaturo, le femmene

                           stanno sempe pronte.

CAROLINA        'Ncapo te lo menasse!

GIOANNI           E che le fai? Quisso la tene chiù tosta de no           

                            piscone.

CAROLINA       Mò m'agghia proprio arritirà, ca 'sto varrilo pesa.

                            (fa per uscire)

FRANCISCO     Carolì, statti bona e fa chiano, chiano pe' 'sse

                           scale. T'avessema venì a azà da 'nterra.

CAROLINA       (affacciandosi) Tengo a chi m'aza. (esce)

GIOANNI          (scorgendo sullo sfondo un braccio che agita un ferro

                           da stiro a carboni) Francì, lo vì a masto Nicola come

                           ventolea lo fierro pe' fa accippà li carauni?

FRANCISCO     Ea 'na scusa p'ascì da la poteca a sente che dicimo.

GIOANNI           E mogghiereta? Non s'è bista pe' nienti.

FRANCISCO     E' persa la capo appriesso a la lana. Sta sempe co li

                           fierri, lo vinnolo, lo 'nnaspaturo, lo fuso...

GIOANNI          E te lamienti? Mogghierema sta facenno la salza e           

                           ddra appiccia fuoco co lo iosciaturo e gira pemmadore

                           dint'a lo caodaro.

FRANCISCO     Co 'sso caodo?! Sa che sudate!

GIOANNI           E pecché, io non sudo a menà lo stroncone           

                           sott'e'ncoppa?

FRANCISCO     Io stao uno piezzo d'acqua.

GIOANNI          Pensa a vierno...'na bella vracera co l'assucapanni,

                            lo moneco dint'a lo lietto...

FRANCISCO     Le levene che se consumeno... Gioà, lassa fa caodo

                           ca lo friddo non ce mancarrà.

GIOANNI          (sentendo delle grida all'esterno) Le vì lò! Mo           

                            iesceno li vastasi da do li prieuti.

FRANCISCO      'Ssi vagliuni de mò so' buoni sulo a pazzià. A l'anni

                            loro da mò che ghiavamo a lo masto.

GIOANNI          Quissi se 'mpareno sulo a ghiocà a cartocci, a

                           ciociole, a tozzolillo, a menà lo strummolo, a fa a           

                           seta setella, a fa la scateca, a accide aucielli co

                            le frecce, a corre appriesso a 'na palla...

FRANCISCO     Quissi fanno male fine.

 
 
  Rappresentata a Carnevale del 1986.
Interpreti:
Marco Zullo (Gioanni) - Diego Pierro (Francisco) - Lucia Resce (Carolina) - Glauco Corso('Ndonio)