FONTANA - Uh, Madonna mia! Ch'è succiesso?! Tutta 'ssa gente qua, che va trovenno? L'è venuta sete tutt'a 'na vota? Ma che d'è? Che voliti da me a quest'ora de notte?
CORO - T'ima fa la festa!
FONTANA - La festa? A me? ... Me volessevo scarrupà?
CORO - T'ima fa la festa, 'na festa vera!
FONTANA - E pecché?
CORO - Pecché tieni cient'anni!
FONTANA - (portando la mano all'orecchio) Come?
CORO - (gridando) Pecché fai ... cient'anni!
FONTANA - Ma vui che diciti ... Siti asciuti pacci? Io, cient'anni? Io me sento ancora 'na criatura. Me pare aieri ca so' nata. (pausa) Qua miezo - lo vi' - ce steva sulo io. Po' agghio saputo da li viecchi che veneveno a beve ca qua era tutto fore ... ce steva sulo terra e alberi. E proprio qua, a do' hanno fatt'a me, ce steva 'n'albero de sauco, gruosso, co' li fiuri ianchi, e sott'a 'sso sauco li Casalissi faceveno lo giuramento d'esse sempe uniti, de s'aiutà l'uno co' l'ato, d'esse d'una famiglia, com'a tanta rami de lo stesso albero. E chi non era de lo Casale, pe' ce venì a abità, era fa primo lo giuramento, era deventà pur isso 'no ramo de lo sauco. (portando l'indice sulla bocca) E citto ... Si 'no Casalisso faceva cocchecosa de male, nisciuno de l'ati parlava ... nisciuno l'accusava: lo sauco tutto sapeva, ma nienti diceva.
CORO - Stasera ima rinnovà lo giuramento, tutti quanta ... quanti ne simo!
FONTANA - Faciti come piace a vui. (pausa) Ma tutti qua a do' me siti venuti? E sorema? L'iti romasta sola? A quella poverella 'ncopp'a lo belvedere de lo Municipio viecchio nisciuno l'è ghiuta a trovà? Nui simo gemelle, simo nate assieme, c'hanno fatto le stesse mani, callose, forti, precise, mani de masti che sapeveno usà lo filo a piombo.
CORO - E chi ereno 'ssi masti?
FONTANA - Eh, figghi belli! Ve facesse li nomi ... ma chi se le ricorda ... La capo non tanto m'accompagna. Me ricordo, però, quanno abbiai a menà acqua, ch'arrivava da la Scarpuzza ... Che contentezza ... La gente pareva 'mpacciuta ... varrili, conche, cicini ... quanto poteva arrivà a enghie. Se faceva la fila. Primo, li Casalissi a pigghià l'acqua erena j a lo Varriciello. Saccio che te dico! E mo arrivavi ... 'no passo ... 'n'ato passo ... 'n'ato passo ancora ... 'n'ato ... (la voce si spegne e gli occhi si chiudono).
CORO - E mo che fai? T'adduormi? Ueh!
FONTANA - (riprendendosi) Stavo troppo stracca ... Accussì mini acqua in continuazione ... Chi ha dormuto mai. Me credeva, quanno me mettiereno 'sso coso pe' m'appilà la 'occa, ca me poteva riposà 'no poco. Macché! Ia sta sempe a l'erta ... non te puoi distrae. Uno vene, gira (mima) ... e tu ia sta pronta pe' lo fa veve. Co' 'sto coso che miti misso, me teniti a comando! Ogni tanto, però, la notte ve saluto (mima). La colpa non è la mia, però ... è la vosta. Vui me tirati tutto, m'assucati proprio.
CORO - La colpa èa de lo tiempo ... chiove poco!
FONTANA - (rivolgendosi ad uno spettatore, con tono irato) Tu lò stai?! Si t'acchiappo (mima), te strafoco. Quanta vote sì venuto qua dereto a fa la "fontana" 'ncuollo a me?! Non puoi j da 'n’ata parte? Da criaturo t'agghio sopportato, ma mo no. Mo stavo 'no poco chiù pulita. Che ne sapiti ch'agghia avuta sopportà. La matina, quanno ieveno fore, e la sera, quanno s'arritiraveno, passaveno tutti da qua: uommini, femmene e animali ... ciucci, pecore, crape ... Li cristiani veveveno e l'animali me pagaveno ... in natura (mima). Certe puzze (turandosi il naso) ... pare ca le sento ancora. Basta mo ... m'è seccato lo cannarone!
CORO - Meh, non ce lassà accossì! Raccontece cocc'ata cosa.
FONTANA - Tengo la capo ca me omma. Sapessevo quanta n'agghia avuta sente. Tutto quello che succedeva dint'a le case qua se veneva a raccontà. Io saccio li fatti de tutti quanta. E' megghio ca non me faciti parlà. Quanta 'nnammorati m'hanno passato pe' 'nnanzi ... quanta promesse s'hanno fatto ... quanta vasi s'hanno dati ammucciati arreto a me. Femmene che ghieveno e veneveno: co' la scusa de pigghià l'acqua se 'ncontraveno co' li 'nnammorati. Ce ne steva una che veneva a enghie 'na decina de varrili a lo juorno. O teneva 'na famiglia grossa, o teneva 'no gruosso 'nnammorato. Mo, non vene chiù nisciuno. Ma a do' vanno a parlà? A do' se 'ncontreno? Me pare ca è cagnato tutte cose. Machine che vanno sott'e 'ncoppa, gente spartuta ... chi a no quarto, chi a 'n'ato. Non ce capisco chiù nienti. Quant'ereno belli li tiempi de 'na vota! A quest'ora, che pace, che silenzio, se senteva sulo cocche 'nnammorato cbe portava la serenata.
(Due interpreti e il coro cantano la Tarantella di Buonalbergo, di Raffaele Scocca, che qui si trascrive nella versione fornita gentilmente dai figli.)
TARANTELLA DI BUONALBERGO
CORO Oi ne', che bella luna c'è massera!
Quess'è 'na luna de fuje figghiole.
Asciti a la finesta, pe' favore
sentiti che profumo de viole.
RIT. Oi belle figghiole veniti a ballà
ca 'sta tarantella ve fa marità.
Oi bella figghiola non fa la scontrosa
ca pizzoli e vasi non fanno pertosa.
FRANCISCO Carmè, t'aspetto 'nnandi a la fontana
non ce lo ddice a mammeta ca vieni;
si è chino lo varrilo, va lo sfratta
vienel’a enchie, ca t'agghia parlane. RIT.
CARMELA Francì, vattenne! Si te sente mamma
lo ddice a tata e pò me manna a corca.
Tu mo vattenne mmiez'a lo palazzo
famme sentì no poco s'orghinetto. RIT.
FRANCISCO Figghió, massera non pozzo sonane
pecché‚ 'sto core vole fa’ l'amore;
me tremeno le ddeta e te lo ddico
da quanno s'uocchi tui m'hanno 'uardato. RIT.
CARMELA Vaglió, fallo pe' me, vattenne a spasso!
Vattenne mmiez'a li compagni tui;
la sienti a mamma? già me dice:"A corca!
ca a mezanotte t'hai azà a ammassane". RIT.
FRANCISCO Va bbuono, statti bona, vatte corca
ma cuogghiemella prima 'na viola;
cuogghieme quessa ddró 'ind'a 'ssa testa,
queddra ca mo te teddrecava 'nfacci. RIT.
CARMELA Mo te la dao, ma tu statti citto
non fa ca pò lo ddici a tutti quanta;
questa ca tengo 'npietto mo te meno,
c'hagghio pensato ch'è da stammatina. RIT.
FRANCISCO Io me ne vavo, bella, statti bona!
Duormi co' ‘ss'uocchi tui e co' 'sto core:
Vav'a sonà a dó Peppa la fornara
ca ddra s'abballa co' tanta figghiole. RIT.
CARMELA Vattenne, e statt'accuorto a 'ssa viola,
non te la fa arrobbà, me raccomando;
ca si la pierdi da me chiù no l'hai...
li Casalissi sanno fa’ ‘sse cose. RIT.
FRANCISCO Tu certo a lo
Casale già ce pienni,
mo ca ce penso, già me l'hanno ditto.
Tu pienni a Santianni e a Tarravecchia
te vuoti come fa lo girasole. RIT.
CARMELA Che vuoi, Francì, chi è bello è sempe bello
e qua vagliuni belli ce ne stanno,
ma com'a te non ce sta nisciuno
ca suoni l'orghinetto e sai cantane. RIT.
FRANCISCO Massera, Carmelì, tu ce vuo' sfotte,
te vuoi pigghià co' me la pizzicata;
ma tu lo ssai ca quanno Ciccio 'ncoccia
fa ascì lo ffuoco da sott'a le scarpe.
CORO Oi ne', a la luna nova, ieri sera
se ne fuivo 'na bella figghiola:
Carmela, co' Francisco sonatore...
e ddrà sonaro tutta la nottata. RIT.
(Quando la serenata termina, dal pubblico esce gridando un capopopolo, che invita i Casalissi a ripetere con lui il "giuramento de lo sauco")
LO GIURAMENTO DE LO SAUCO
CO' 'STO SAUCO STRINTO 'MMANI
'NNANZ'A TUTTI 'SSI CRISTIANI
M'AVESSERA MANGIA' CIENTO CANI
SI QUELLO CHE GIURO NON MANTENGO DOMANI.
CO' LO GIURAMENTO CHE MASSERA IO FAZZO
A LO SAUCO CHIU' FORTE M'ABBRAZZO
E SI PURO ME TAGGHIENO LA CAPO O LO VRAZZO
CO' L'ATI RIUNI GIURO CA NON ARRAZZO.
SONGO DE LO CASALE, SO' CASALISSO
'NA SPECIE DE DIVISA M'AGGHIO MISSO
E SI PURO ME 'NCHIOVENO CROCEFISSO
NON ME CAGNO 'NTARRAVECCHISSO O 'NSANTIANNISSO.
CO' TUTTA LA GENTE DE QUISTO RIONE
STAVO AMMASSATO DINT'A UNO MENTONE
E SI ME VUONNO METTE A PADRONE
GIURO CA FAZZO LA RIVOLUZIONE.
TUTTI ME SITI CHIU' CHE PARIENTI
E DE QUELLO CHE FAI CHE SAI E CHE SIENTI
SI PURO ME SCIOPPENO TUTTI LI DIENTI
GIURO CA IO NON DICO MAI NIENTI.
DE QUISTO SAUCO IO SONGO 'NO FIORE
E ME COMPORTO DA VERO SIGNORE
E PURO SI TENGO COCCHE RANCORE
IO DAO TUTTO CO' TUTTO LO CORE.
